Påska i Jotunheimen

Fjellpåske i majestetiske Jotunheimen
Kva med å byte ut lange heiskøar og trengsel i langrennssporet med boltreplass blant landets høgaste fjell, utsøkt lokalmat og hyttehygge?

Påska i Lom og Jotunheimen oppfyller alle påskeklisjear. Ved sidan av sol i fjeset, mjuk vårsnø under skia og god stemning i hytteveggen, innbyr det viltre høgfjellsterrenget til snø- og skileik for både store og små. Her kan du vandre opp i høgda og speide utover tinderekkene, gå frå hytte- til-hytte på fjellski, kruse over kvitlagte isbrear eller berre leike deg i snøen.

Høgfjellspåske på trivelege turisthytter
Strategisk plassert mellom fjelltoppane finn du eit rikt utval av overnattings- og serveringsstader som har lang tradisjon i å ta vare på kresne og
eventyrlystne fjellturistar. I Jotunheimen kan du faktisk bu på den same fjellhytta heile påska, og likevel gå nye dagsturar kvar einaste dag.  Denne moglegheita for «ski rett frå døra» - og eit hav av nærliggande 2000-meterstoppar er eit av Jotunheimens særtrekk. Kulturen og den lokale kortreiste maten har stort fokus i området, så her er det duka for smakfulle opplevingar både før og etter skituren.

Om du ikkje er kjend -  eller ynskjer å finne den beste snøen eller råaste utsikta, tek fjellvante skiguidar deg gjerne med på tur – med fokus på at du skal mestre - og kjenne deg trygg. Om du har glemt noko heime eller manglar ustyr, kan du leige både ski, skredpakke og anna turutstyr; 

Lyst til å teste ein ny aktivitet i fjellet, men manglar utstyr?
Sport 1 Lom har utleige av randonéepakker og skredutstyr du treng til (topp)turen. Her kan du òg levere skia dine inn til gliding! 
Naturopplevingar leiger ut det meste av turustyr frå sitt lager i Lom sentrum. Kan bookast direkte her.
Glitterheim turisthytte har utleige av randonnée-utstyr (ski, feller, sko og staver) fjellski og truger.
Gjendesheim turisthytte har utleige av lette toppturski med stavar, feller, skistøvler (Dynafit og Scarpa), fjellski og skredsikringspakker, samt bekledning, sekk og anna du treng til (topp)turen. Sjå full oversikt og book utstyr her.

Både bortover – og nedoverski
Sjølv om Jotunheimen er eit ynda topptureldorado, er det tett mellom kvista løyper og dermed ideelt å velje fjellski. Ynskjer du heller å lange ut i
velpreparerte langrennsløyper, blir det køyrt opp kilometervis med langrennsløyper på høgfjellsplatåane Sognefjellet og Valdresflye. På Valdresflye finn du eit stort nettverk av oppkøyrte langrennsløyper, sjå her for oversikt over løyper. Det blir òg køyrt opp løyper på Sognefjellet i påska. For barnefamiliane er dessutan fjellstovene ei ypperlig base for kortreiste og varierte uteaktivitetar heile påska.

Toppturar blant Norges høgaste fjell
Jotunheimen er eit eldorado for toppturar, med dei høgaste fjella og noko av den råaste skikøyringa ein finn i Norge. Sjå topptursida vår for meir info om topptursesongen i Jotunheimen. Er du gira på heisbasert nedoverkøyring i påska, ligg Lemonsjøen Alpinsenter berre 35 min. køyring unna Lom sentrum.

Lom - fjellbygda mellom aust og vest
Midt i kremen av fjellheimen ligg nasjonalparklandsbyen Lom som eit knutepunkt mellom aust og vest. Det sjarmerande bygdesentrumet er ei
perfekt «feriebase», med gangavstand til bakeri, butikkar og serveringsstader, fleire godt merka lokale vandreturar - og kort veg til fjells! Nasjonalparken midt i Norge har dei høgaste fjella i Nord-Europa, med Galdhøpiggen og Glittertinden som dei to høgaste. Faktisk ligg dei aller fleste av landets drøye 300 toppar over 2000-meter i Jotunheimen. Dei mange isbreane bidrar til å forlenge vårskisesongen.

Korleis kome seg til Jotunheimen i påska? 
For å kome seg til Lom nasjonalparklandsby følgjer du Rv. 15 (avkøyring frå E6 på Otta). Nasjonal turistveg Sognefjellet (Fv. 55) er vanlegvis stengt ved Rustadsætre i Lom kommune samt ved Turtagrø i Luster kommune vinterstid. Denne blir brøytt og opnar fram til Sognefjellshytta til påske. Nasjonal turistveg Valdresflye (Fv. 51) mellom Beitostølen og Vågå blir òg opna til påske. Sjå vegvesen.no for oppdatert vegmelding.

Turisthyttene til fjells, som er stengt midtvinters grunna private veger inn til hyttene, har eigne ordninar for transport av gjester inn til hyttene. Visdalsvegen (vegen til Spiterstulen turisthytte) er ope. Vegen til Leirvassbu (Leirdalen) er ope til Sletthamn. Buande gjester blir frakta inn til hytta med beltevogn. Det same gjeld på Glitterheim turisthytte. 

Kva skjer i Jotunheimen i påska?
Sjå arrangementskalenderen vår på Facebook for ei oversikt over kva som skjer i Jotunheimen i påska (endringar kan førekome på kort varsel).
Påskeprogram: I denne posten finn du eit utval av kva som skjer!

Og hugs; det er lov å bli sittande i solveggen og berre nyte roa og utsikta - og ein god appelsin!
Velkomen til fjells - vi gler oss til sjå deg!