Velkomen til vinteren i Jotunheimen

I Jotunheimen kan vi freiste med boltreplass blant landets høgaste fjell, utsøkt lokalmat, peiskos og hyttehygge. Og ikkje minst, er det duka for uteleik og basking i snøen. Visit Jotunheimen ynskjer å gje deg den aller beste toppturopplevinga i vinter og vår. Guida turar og kurs, trivelege overnattingsstader, mat og drikke av ypperste klasse, enkel utstyrsleige og gode handelstilbod – toppa med rå skikøyring. Velkomen til vinteren i Jotunheimen! 

Jotunheimen på ski -  for alle nivå:
Faktum er at ingen norske fjell tek deg høgare på ski. Så finn fram feller og toppturski, og oppsøk skieldoradoet Jotunheimen i vår! Om du er nybyrjar eller ekstrem frikjøyrar, vil det spektakulære og varierte terrenget mette skihungeren uansett nivå. I Jotunheimen kan du gå alt i frå stutte dagsturar i slakt terreng til den spektakulære Høgruta i Jotunheimen, Norge sitt svar på alpane si Haute Route. Dette er ein fem-dagarstur gjennom eit av landet vårt sine flottaste fjellområde.

Sjå turtips her! 

Guiding og turprogram:
Frå januar til mai kan du delta på eit breitt utval aktivitetar rundt om i Jotunheimen. På programmet har vi alt frå enkle toppturar til den meir krevjande Høgruta, toppturpakker med overnatting og servering, og ulike kurs og foredrag.

Mat og overnatting:
Vil du sove på hotell eller hytte sentralt i Lom, eller på ei fjellstove kor du kan spenne på deg skia rett utafor døra? Jotunheimen og omegn byr på eit rikt utval av overnattingsstader. Kultur og tradisjonell mat har dessutan stort fokus i området, så her ventar smakfulle opplevingar òg etter skituren.

Lyst til å teste ein ny aktivitet i fjellet, men manglar utstyr?
Glitterheim turisthytte har utleige av randonnée-utstyr (ski, feller, sko og staver) fjellski og truger.
Gjendesheim turisthytte har utleige av lette toppturski med stavar, feller, skistøvler (Dynafit og Scarpa), fjellski og skredsikringspakker, samt bekledning, sekk og anna du treng til (topp)turen. Sjå full oversikt og book utstyr her.
Sport 1 Lom har utleige av randonéepakker og skredutstyr du treng til (topp)turen. Her kan du òg levere skia dine inn til gliding!